Checheniston rahbari Ramzan Qodirov Instagram’dagi sahifasi orqali Rossiya Aralash janglar san’ati (MMA) ittifoqi prezidenti, sobiq kurashchi Fyodor Yemelyanenkoning Grozniyda o‘tkazilgan Grand Prix Akhmat 2016 aralash janglar turnirida yosh bolalar ishtirokini tanqid qilganiga o‘z munosabatini bildirdi.
“Agar Fyodor Yemelyanenko Grand Prix Akhmat 2016 turniri haqida iliq so‘zlar aytib, muhimligiga to‘xtalganida, uning javoblari va reaksiyasini tushungan bo‘lardim. Rus bahodiri va vatanparvar sifatida Chechenistonni bayramlar bilan tabriklaganida, hech bo‘lmasa bu yerga kelib turnirlarni qanday o‘tkazayotganimizni va sportni qay tariqa rivojlantirayotganimizni ko‘rganida edi. Lekin uning munosabati bir qancha savollar tug‘dirmoqda.
Fyodor keltirib chiqarayotgan rezonans ham g‘alati ko‘rinmoqda. Har bir inson o‘zi va oilasidan boshlashi kerak. Biroq birovlarning suratini joylab, ular ostida salbiy izohlar yozilishiga sababchi bo‘lish – axloq qoidalariga zid. Biz Chechenistonda Rossiya rahbariyatining vazifalarini bajarish uchun barcha usullardan foydalanamiz, yoshlarni faol ravishda sportga jalb qilamiz. Chechenistonda bolalar uyi, boshpana va qarovsiz bolalar yo‘q. Bolalarga qarshi deyarli jinoyatlar bo‘lmaydi. Chechenistondagi kabi hech qayerda bolalar huquqini himoya qilish borasida ish olib borilmaydi.
Nima uchun aynan bolalar ishtirokidagi ko‘rgazmali janglar odamlarda dahshat uyg‘otadi? Axir urush vaqtida 13987 bola, 100 ming nafardan ortiq kishi halok bo‘lgandi, 5 ming odam bedarak yo‘qolib, butun Checheniston vayron bo‘lgandi. Mana shu voqealar sodir bo‘lganida sizlar dahshat haqida gapirganmidingiz? Biz yoshlarni Rossiya himoyachisi va vatanparvar qilib katta qilyapmiz. Fyodor, siz nohaqsiz! Rus bahodirlari bunday qilmaydi!”, – deb yozdi Qodirov.
Avvalroq “Axmat” jang klubi prezidenti Abuzayd Vismuradov Fyodor Yemelyanenkoning bolalar jangini tanqid qilishga haqqi yo‘qligini bildirgan edi.
Rossiya MMA ittifoqi bayrog‘i ostidagi turnirlarni o‘tkazish qoidalariga ko‘ra, 12 yoshdan kichik bo‘lgan bolalarga jang qilishga ruxsat berilmaydi.
Ta’kidlash kerakki, Checheniston rahbari Ramzam Qodirovning uch nafar o‘g‘li ham Grand Prix Akhmat 2016 turnirida ko‘rgazmali jang o‘tkazib, barchasi g‘alaba qozongan edi.
Izoh (0)