BMT Sudanning Darfur provinsiyasida kimyoviy qurol qo‘llangani dalillarini topgani yo‘q. Bu haqda 4-oktabr, seshanba kuni xalqaro tashkilot bosh kotibining tinchlikparvarlik operatsiyalari bo‘yicha o‘rinbosari Erva Ladsus Xavfsizlik kengashi yig‘ilishida ma’lum qildi, deya xabar beradi “TASS”.
“Biz Darfurning Jabal-Marra tumanida kimyoviy qurol ishlatilganini tasdiqlovchi dalillar topganimiz yo‘q. Shu bilan birga, Afrika Ittifoqi va BMTning Darfurdagi hamkorlikdagi operatsiyasi mazkur hududga kirishda Sudan hukumati cheklovlari tufayli qiyinchilik sezmoqda. Bu missiya uchun vaziyatni kuzatish va jangovar harakatlar oqibatlari haqida hisobot berishda qiyinchiliklar tug‘dirdi”, — deya ta’kidladi Ladsus.
Amnesty International huquq himoyachilari tashkiloti 29-sentabr kuni Sudan hukumat kuchlari joriy yil boshidan beri Darfurdagi Jabal-Marra tumanida kamida 30 marta kimyoviy hujum amalga oshirgani haqidagi hisobotni e’lon qildi. Buning oqibatida 250 nafargacha odam, jumladan, ko‘plab bolalar halok bo‘lgani taxmin qilinmoqda. Sudan rasmiylari kimyoviy qurol qo‘llanishi haqidagi ayblovlarni “asossiz va soxtalashtirilgan” deb atab, butkul rad etmoqda.
Izoh (0)