БМТ Суданнинг Дарфур провинциясида кимёвий қурол қўллангани далилларини топгани йўқ. Бу ҳақда 4 октябрь, сешанба куни халқаро ташкилот бош котибининг тинчликпарварлик операциялари бўйича ўринбосари Эрва Ладсус Хавфсизлик кенгаши йиғилишида маълум қилди, дея хабар беради «ТАСС».
«Биз Дарфурнинг Жабал-Марра туманида кимёвий қурол ишлатилганини тасдиқловчи далиллар топганимиз йўқ. Шу билан бирга, Африка Иттифоқи ва БМТнинг Дарфурдаги ҳамкорликдаги операцияси мазкур ҳудудга киришда Судан ҳукумати чекловлари туфайли қийинчилик сезмоқда. Бу миссия учун вазиятни кузатиш ва жанговар ҳаракатлар оқибатлари ҳақида ҳисобот беришда қийинчиликлар туғдирди», — дея таъкидлади Ладсус.
Amnesty International ҳуқуқ ҳимоячилари ташкилоти 29 сентябрь куни Судан ҳукумат кучлари жорий йил бошидан бери Дарфурдаги Жабал-Марра туманида камида 30 марта кимёвий ҳужум амалга оширгани ҳақидаги ҳисоботни эълон қилди. Бунинг оқибатида 250 нафаргача одам, жумладан, кўплаб болалар ҳалок бўлгани тахмин қилинмоқда. Судан расмийлари кимёвий қурол қўлланиши ҳақидаги айбловларни «асоссиз ва сохталаштирилган» деб атаб, буткул рад этмоқда.
Изоҳ (0)