Qirg‘izistonda 777 AAA davlat avtomobil raqam belgisi bo‘yicha o‘tkazilgan onlayn kimoshdi savdosi g‘olibi 1 million 716 ming qirg‘iz so‘mi (25 200 dollar) to‘ladi. Bu haqda Davlat ro‘yxatga olish xizmati ma’lum qildi, deya xabar bermoqda KNews.
Xizmat axborotiga ko‘ra, mablag‘ning 91 foizi yoki 1 million 561,6 ming qirg‘iz so‘mi Qirg‘iziston budjetiga o‘tkaziladi. Qolgan 9 foizi esa “Infokom” davlat korxonasi ixtiyorida qoladi.
“Bu pulga 322 pensiya, o‘qituvchilarning 111 maoshi yoki kam ta’minlangan oilalar bolalariga 1 927 nafaqa to‘lash mumkin. Xizmat raisi onlayn kimoshdi savdosi g‘olibiga mamlakat budjetiga qo‘shgan hissasi uchun minnatdorchilik bildirdi va sertifikat hamda sovg‘alarni topshirdi”, — deyiladi xabarda.
Onlayn auksionda g‘olib chiqib, davlat raqam belgisini sotib olgan shaxsning ismi oshkor etilmagan.
Eslatib o‘tamiz, avvalroq davlat raqam belgisini qirg‘izistonlik taniqli ishbilarmon Jur’at Ablullayev sotib olgani aytilgan, biroq keyinroq Davlat ro‘yxatga olish xizmati raqamni Abdullayev sotib olgani haqidagi xabarlarni inkor qilgan edi.
Izoh (0)