Toshkentda O‘zbekiston va Turkmaniston savdo-iqtisodiy, ilmiy-texnikaviy va madaniy hamkorlik bo‘yicha hukumatlararo komissiyasining 12-yig‘ilishi bo‘lib o‘tdi. Bu haqda UzReport xabar bermoqda.
Yig‘ilishda ikki tomonlama savdo-iqtisodiy munosabatlar holati va istiqbollari, shartnomaviy-huquqiy bazani kengaytirish, transport, atrof-muhitni muhofaza qilish borasida aloqalarni rivojlantirish hamda qator boshqa masalalar muhokama etildi.
O‘tgan yil yakunlari bo‘yicha o‘zaro savdo-sotiq hajmi 319,7 million dollarni, joriy yil 7 oyi mobaynida esa 177 million dollarni tashkil etgani qayd etildi.
Transport sohasida hamkorlikni kengaytirish, xususan, tranzit yuk tashish borasida o‘zaro imtiyoz va yengilliklar taqdim etish muhimligi, bu ularning hajmi ortishiga olib kelishi ta’kidlandi.
Yig‘ilish yakunlari bo‘yicha tomonlar tegishli bayonnomani imzoladi. Erishilgan kelishuvlar O‘zbekiston va Turkmaniston o‘rtasida transport, ilmiy-texnik, suv resurslaridan samarali foydalanish va boshqa qator masalalarda hamkorlikni mustahkamlashga imkon beradi.
Izoh (0)