O‘zbekistonda shaxsiy hayot daxlsizligi qonun bilan himoyalandi

O‘zbekiston Ma’muriy javobgarlik to‘g‘risidagi kodeksi va Jinoyat kodeksi shaxsiy hayot daxlsizligini buzganlik uchun javobgarlikni ko‘zda tutuvchi me’yorlar bilan to‘ldirildi. Bu haqda “Gazeta.uz” xabar bermoqda.

Ma’muriy javobgarlik to‘g‘risidagi kodeksning yangi, 46-1-moddasiga muvofiq, tegishli roziliksiz shaxsiy yoki oilaviy sir bo‘lgan ma’lumotlarni to‘plash yoki tarqatish eng kam ish haqining 10 dan 40 barobarigacha jarimaga tortilishga sabab bo‘ladi.

Jinoiy kodeksning yangi, 141-1-moddasiga ko‘ra, ma’muriy choralardan so‘ng shunday harakatlarning takrorlanishi eng kam ish haqining 50 dan 100 barobarigacha jarima yo 2 yilgacha axloq tuzatish ishlari yoki 6 oygacha qamoq bilan jazolanadi.

Og‘ir oqibatlarga olib kelgan, g‘arazli maqsadda yoki xavfli retsidivist tomonidan amalga oshirilgan shunday harakatlar uchun eng kam ish haqining 100 dan 200 barobarigacha jarima yo 1 yildan 3 yilgacha ozodlikni cheklash yoki 3 yilgacha muddatga ozodlikdan mahrum etish choralari qo‘llaniladi.

Mazkur qilmishlarga qo‘l urgan shaxs aybini tan olib, jabrdiyda bilan yarashgan va yetkazilgan zararni qoplagan taqdirda jinoiy javobgarlikdan ozod etilishi mumkin.

Kodekslarga kiritilgan o‘zgarishlar 24-sentabr, shanba kunidan boshlab kuchga kirdi.