Ўзбекистон Маъмурий жавобгарлик тўғрисидаги кодекси ва Жиноят кодекси шахсий ҳаёт дахлсизлигини бузганлик учун жавобгарликни кўзда тутувчи меъёрлар билан тўлдирилди. Бу ҳақда «Газета.uz» хабар бермоқда.
Маъмурий жавобгарлик тўғрисидаги кодекснинг янги, 46-1-моддасига мувофиқ, тегишли розиликсиз шахсий ёки оилавий сир бўлган маълумотларни тўплаш ёки тарқатиш энг кам иш ҳақининг 10 дан 40 баробаригача жаримага тортилишга сабаб бўлади.
Жиноий кодекснинг янги, 141-1-моддасига кўра, маъмурий чоралардан сўнг шундай ҳаракатларнинг такрорланиши энг кам иш ҳақининг 50 дан 100 баробаригача жарима ё 2 йилгача ахлоқ тузатиш ишлари ёки 6 ойгача қамоқ билан жазоланади.
Оғир оқибатларга олиб келган, ғаразли мақсадда ёки хавфли рецидивист томонидан амалга оширилган шундай ҳаракатлар учун энг кам иш ҳақининг 100 дан 200 баробаригача жарима ё 1 йилдан 3 йилгача озодликни чеклаш ёки 3 йилгача муддатга озодликдан маҳрум этиш чоралари қўлланилади.
Мазкур қилмишларга қўл урган шахс айбини тан олиб, жабрдийда билан ярашган ва етказилган зарарни қоплаган тақдирда жиноий жавобгарликдан озод этилиши мумкин.
Кодексларга киритилган ўзгаришлар 24 сентябрь, шанба кунидан бошлаб кучга кирди.
Изоҳ (0)