O‘zbekiston Markaziy saylov komissiyasi (MSK) mamlakatda ro‘yxatga olingan barcha to‘rt partiyaga 4-dekabr kuni bo‘ladigan O‘zbekiston Prezidenti saylovida ishtirok etishga ruxsat berdi. Bu haqda MSK raisi Mirzo Ulug‘bek Abdusalomov 23-sentabr kuni Toshkentda bo‘lib o‘tgan brifing chog‘ida ma’lum qildi, deya xabar bermoqda “Gazeta.uz”.
Prezident saylovini yoritish bo‘yicha Respublika matbuot markazidan “Daryo”ga xabar berishlaricha, MSK prezidentlik saylovida ishtirok etish uchun siyosiy partiyalar taqdim etgan arizalar va boshqa hujjatlarini ko‘rib chiqib, O‘zbekiston “Milliy tiklanish” demokratik partiyasi, Tadbirkorlar va ishbilarmonlar harakati – O‘zbekiston Liberal-demokratik partiyasi, O‘zbekiston Xalq demokratik partiyasi va O‘zbekiston “Adolat” sotsial-demokratik partiyasiga saylovda ishtirok etishga ijozat berish to‘g‘risida qaror qabul qildi.
MSK siyosiy partiyalarning vakolatli vakillariga ro‘yxatga olinganlik guvohnomalari va belgilangan namunadagi imzo varaqalari blankalarini berdi.
Majlisda O‘zbekiston Prezidenti saylovini o‘tkazuvchi okrug saylov komissiyalarini tuzish va ularning shaxsiy tarkibini tasdiqlash to‘g‘risidagi masala ham ko‘rib chiqildi.
Komissiya a’zolari saylovga tayyorgarlik ko‘rish va uni o‘tkazish bilan bog‘liq boshqa masalalarni ham muhokama qildi. Ko‘rilgan barcha masalalar yuzasidan tegishli qarorlar qabul qilindi.
Izoh (0)