O‘zbekiston Prezidenti vazifasini bajaruvchi Shavkat Mirziyoyev “O‘zbekiston Respublikasining fuqaroligi to‘g‘risida”gi Qonunga kiritilgan tuzatishlarni imzoladi. Bu haqda “Gazeta.uz” xabar bermoqda.
Qonunning yangilangan 21-moddasiga ko‘ra, chet el fuqaroligini qabul qilgan shaxs 30 kun davomida bu haqda ichki ishlar idoralari yoki O‘zbekistonning konsullik muassasalariga ma’lum qilishi lozim.
O‘zgartirish kiritilgan 26-moddaga asosan, O‘zbekiston fuqarolari (yoki fuqaroligi bo‘lgan er-xotinning biri) tomonidan farzandlikka olingan chet el fuqarosi xorijiy davlat fuqaroligidan chiqqan taqdirdagina O‘zbekiston fuqaroligiga qabul qilinadi.
Avvalgidek, O‘zbekiston fuqaroligi quyidagi holatlarda yo‘qotilishi mumkin:
- chet davlatda harbiy xizmat, xavfsizlik xizmati, politsiya, adliya idoralari yoki davlat hokimiyati va boshqaruvining boshqa idoralariga ishga kirilishi;
- xorijda doimiy yashovchi shaxsning besh yil davomida uzrli sabablarsiz konsullik hisobida turmasligi;
- O‘zbekiston fuqaroligining yolg‘on ma’lumotlar yoki soxta hujjatlar taqdim etish asosida olingani;
- xorijiy davlat foydasini ko‘zlab faoliyat ko‘rsatish yoki tinchlik va xavfsizlikka qarshi jinoyatlar sodir etish orqali jamiyat hamda davlat manfaatlariga jiddiy zarar yetkazilishi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)