Janubiy Afrika Respublikasida talabalar 2017-yilda ta’lim uchun haqning 8 foizga oshirilishiga qarshi namoyishlarga chiqdi. Ko‘plab universitetlarda norozilik namoyishlari politsiya bilan to‘qnashuvlar va mulkning vayron qilinishiga aylanib ketdi, shu bois darslar bir necha kunga to‘xtatilgan. Bu haqda “TASS” xabar bermoqda.
Sharqiy Kap viloyatidagi Fort-Xeyr universitetida talabalar o‘quv yurti binolaridan biriga o‘t qo‘ydi, oynalarni sindirib, eshiklarni buzib, universitetga kirishni to‘sib qo‘ydi.
Yoxannesburgdagi mashg‘ulotlari bir haftaga to‘xtagan Vitvatersranda universitetida talabalarning politsiyachilar bilan to‘qnashuvi qatorasiga ikkinchi kun davom etmoqda.
Huquq-tartibot xodimlari shovqin granatalari va rezina o‘qlarni qo‘lladi. Buning natijasida uch talaba yaralandi, ikki nafari hibsga olindi. Bundan bir kun avval 31 talaba qo‘lga olingan edi.
“Talabalar faqat talablarini ilgari surmoqda, eshitishni umuman istamayapti. Agar ular universitetlar ta’lim uchun haqning oshirmasdan ham faoliyat ko‘rsatishi mumkin deb hisoblasa, shu tariqa o‘quv yurtlarini halokatga yetaklayotgan bo‘ladi”, — deya ta’kidladi JAR oliy ta’lim vaziri Bleyd Nzimande.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)