AQShda sud Davlat departamentiga Klinton xatlarining bir qismini prezidentlik saylovlarigacha e’lon qilish majburiyatini yukladi
Kolumbiya okrugi federal sudi Davlat departamentiga sobiq davlat kotibi Hillari Klintonning FQB tomonidan aniqlangan 14,9 ming elektron xatidan 1050 ta sahifani prezidentlik saylovlarigacha e’lon qilish majburiyatini yukladi, deb yozadi “TASS” sud qaroriga tayanib.
Sud qaroriga muvofiq, Davlat departamenti 2016-yil 7-oktabrgacha, 21-oktabrgacha va 4-noyabrgacha 350 tadan sahifani chop etishi kerak. Shundan so‘ng tashqi siyosiy muassasa har oyda sobiq davlat kotibining o‘chirib tashlangan yozishmalaridan 500 sahifadan e’lon qilib borishi kerak.
Bunda gap FQB tomonidan qayta tiklangan yetti qattiq diskning birinchisidagi xatlar haqida bormoqda. Yana uchta disk tahlilini Davlat departamenti 17-oktabrga qadar yakunlashi kerak.
Klinton Davlat kotibi lavozimida xizmat yozishmalarini shaxsiy pochta manzili orqali olib borgani haqidagi shov-shuv 2015-yil martida yuzaga keldi. U shaxsiy elektron pochtasi orqali maxfiy ma’lumotlarni jo‘natganini rad etdi.
