DC Leaks guruhi xakerlari Oq uy xodimlaridan birining elektron pochtasidagi hujjatlarni e’lon qildi, ular orasida AQSh prezidentining rafiqasi Mishel Obamaning pasporti nusxasi ham bor, deb yozadi Meduza. Reuters qayd etishicha, prezident ma’muriyati pasportning haqiqiyligini tasdiqlaganicha yo‘q.
Ommaga e’lon qilingan yozishma Yen Mellalga tegishli, u rasmiy tashriflarni rejalashtirish bo‘yicha javobgardir. Oshkor etilgan hujjatlar orasida AQSh vitse-prezidenti Jo Bayden, Mishel Obama, AQSh prezidentligiga nomzod Hillari Klintonning AQSh bo‘ylab safarlarining batafsil yo‘nalishlari va jadvallari bor. Shuningdek, AQSh prezidentining Kubaga tashrifi chog‘ida uning xavfsizligi uchun mas’ul bo‘lgan Maxfiy xizmat xodimlarining ism-shariflari ham fosh etildi. Xatlar 2015-yil fevralidan 2016-yil iyuligacha bo‘lgan davrga taalluqli.
Oq uy vakili Josh Ernest so‘zlariga ko‘ra, Mellal prezident ma’muriyatida shartnoma bo‘yicha ishlaydi va shtatda turmaydi. Mellalning yozishmalari uning Gmail’dagi pochta akkauntidan o‘g‘irlangan. Xakerlarning Twitter’iga ko‘ra, hujjatlar 20-sentabrdayoq internetga joylangan, ammo bunga endigina e’tibor qaratildi.
Izoh (0)