Putin birinchi marta Bloomberg versiyasi bo‘yicha dunyoning eng nufuzli kishilari ro‘yxatiga kirdi
Rossiya prezidenti Vladimir Putin birinchi marta Bloomberg agentligi versiyasiga ko‘ra dunyoning 50 nafar eng nufuzli kishilari reytingiga kiritildi, deb yozadi “Vedomosti”. U ro‘yxatda 30-o‘rinni egalladi.
“Putin sanksiyalar hamda yoqilg‘i manbalarining narxi pasayib ketishi yuzasidan unchalik ko‘p xavotir ko‘rsatgani yo‘q… Butun dunyo Rossiya prezidenti bundan keyin nima qilishini kutmoqda, uning harakatlari iqtisodiy va moliyaviy beqarorlikka olib kelishi, neftga, Sharqiy Yevropadagi chegaradosh mamlakatlarga, Yaqin Sharqqa va, ehtimol, hattoki AQSh prezidentligiga saylovlarga ham ta’sir o‘tkazishidan biroz xavfsiramoqda”, — deyiladi Bloomberg xabarida.
Reytingda Putindan boshqa rossiyaliklar yo‘q. Ro‘yxatda Buyuk Britaniya bosh vaziri Tereza Mey yetakchilik qildi. Ikkinchi o‘rinni Respublikachilar partiyasidan AQSh prezidentligiga nomzod Donald Tramp egalladi. Yuqori uchlikni Trampning Demokratik partiyadan raqibi Hillari Klinton yakunladi.
Top o‘ntalikka shuningdek, Xitoy Xalq Respublikasi raisi Si Szinpin, Amazon asoschisi va rahbari Jeff Bezos, Germaniya kansleri Angela Merkel, Yevropa markaziy banki prezidenti Mario Dragi, AQSh Federal zaxira tizimi rahbari Janet Yellen, Berkshire Hathaway bosh direktori Uorren Baffet va Braziliya federal sudyasi Serjio Moro kirdi.
