DC Leaks гуруҳи хакерлари Оқ уй ходимларидан бирининг электрон почтасидаги ҳужжатларни эълон қилди, улар орасида АҚШ президентининг рафиқаси Мишель Обаманинг паспорти нусхаси ҳам бор, деб ёзади Meduza. Reuters қайд этишича, президент маъмурияти паспортнинг ҳақиқийлигини тасдиқлаганича йўқ.
Оммага эълон қилинган ёзишма Йен Меллалга тегишли, у расмий ташрифларни режалаштириш бўйича жавобгардир. Ошкор этилган ҳужжатлар орасида АҚШ вице-президенти Жо Байден, Мишель Обама, АҚШ президентлигига номзод Ҳиллари Клинтоннинг АҚШ бўйлаб сафарларининг батафсил йўналишлари ва жадваллари бор. Шунингдек, АҚШ президентининг Кубага ташрифи чоғида унинг хавфсизлиги учун масъул бўлган Махфий хизмат ходимларининг исм-шарифлари ҳам фош этилди. Хатлар 2015 йил февралидан 2016 йил июлигача бўлган даврга тааллуқли.
Оқ уй вакили Жош Эрнест сўзларига кўра, Меллал президент маъмуриятида шартнома бўйича ишлайди ва штатда турмайди. Меллалнинг ёзишмалари унинг Gmail’даги почта аккаунтидан ўғирланган. Хакерларнинг Twitter’ига кўра, ҳужжатлар 20 сентябрдаёқ интернетга жойланган, аммо бунга эндигина эътибор қаратилди.
Изоҳ (0)