ShHT mamlakatlari oliy sudyalari ota-onalarning bola tarbiyasidagi mas’uliyatini kuchaytirishni yoqlab chiqdi

Shanxay hamkorlik tashkilotiga a’zo mamlakatlar Oliy sudlari rahbarlari bolalar tarbiyasi uchun ota-onalar mas’uliyatini kuchaytirish fikrini bildirdi, deb yozadi “TASS”. Bu haqda Dushanbeda bo‘lib o‘tgan ShHTga a’zo davlatlar Oliy sudlari raislarining 11-majlisi yakunlariga ko‘ra qabul qilingan qo‘shma bayonotda aytiladi.

Majlisda ekstremizm va terrorizmga aloqador jinoyatlar haqidagi ishlarni ko‘rib chiqish amaliyoti bo‘yicha tajriba va ma’lumot almashish, ShHTga kiruvchi davlatlar qonunchiligida ko‘zda tutilgan ota-onalarning bola tarbiyasi borasidagi mas’uliyati va boshqa masalalar muhokama qilindi.

“Majlis ishtirokchilari oilada bolaning to‘g‘ri tarbiyalanishiga, bolaning huquqlari sud tomonidan ta’minlanishiga katta ahamiyat qaratgan holda, bolalarni tarbiyalash va o‘qitishga kundalik e’tibor berish, ota-onalarning bolalar tarbiyasi uchun mas’uliyatini kuchaytirishga qaratilgan choralarni qabul qilish, shuningdek, sud organlarining ushbu sohadagi hamkorligini rivojlantirish kerakligini ta’kidladi”, — deyiladi bayonotda.