Xalqaro futbol federatsiyasi (FIFA) bilan hamkorlikni to‘xtatgan Fransiyaning France Football jurnali “Oltin to‘p” mukofotini topshirish bo‘yicha yangi qoidalarni e’lon qildi. Unga ko‘ra, mavsumning eng yaxshi futbolchisiga endi faqatgina OAV vakillari ovoz beradi, deb xabar bermoqda “TASS”.
Mukofotga nomzodlarning kengaytirilgan ro‘yxatidan avvalgidek 23 emas, balki 30 nafar futbolchi bo‘ladi. Shuningdek, eng yaxshi uchta nomzodni aniqlash bosqichi bo‘lmaydi. “Oltin to‘p” g‘olibi va barcha futbolchilarning reytingi yil so‘nggida e’lon qilinadi.
France Football jurnali 1956-yildan boshlab “Oltin to‘p” mukofotini eng yaxshi futbolchiga topshirib kelgan edi. 1988-yilda esa FIFA “Yil futbolchisi” mukofotini joriy etdi.
2010-yilda jurnal tahririyati va FIFA besh yillik shartnoma imzolagan edi. Unga ko‘ra, FIFA milliy terma jamoalarning murabbiylari, sardorlari va OAV vakillari ovozi orqali “Oltin to‘p” mukofotini topshirib borishi ko‘zda tutilgan edi.
“Oltin to‘p” mukofotini FIFA topshirishni boshlaganidan buyon unga faqatgina ikki futbolchi — “Barselona” hujumchisi Lionel Messi (2010, 2011, 2012, 2015) hamda “Real” yetakchisi Krishtianu Ronaldu (2013, 2014) qo‘lga kiritgan.
Izoh (0)