10-sentabr kuni taxminan kunduzgi 12 da Samarqand shahrining “O‘rikzor” mahallasida 131-ko‘p xonadonli turar-joy old tomonining bir qismi qulab tushdi. Hodisa haqidagi videosyujetni Samarqandning STV telekanali namoyish qildi, deb yozadi “Gazeta.uz”.
Buyuk ipak yo‘li ko‘chasida joylashgan va kapital ta’mirga ehtiyojmand bo‘lgan uyda 70 oila yashaydi. Uyda istiqomat qiluvchilar fikriga ko‘ra, uyning yerto‘lasi doimiy ravishda suv ostida qolgani tufayli, u avariya holatiga kelib qolgan.
Reportajda aytilishicha, bir necha tonna beton qulab tushgan trotuarda odatda bolalar o‘ynab yuradi, ammo shu kuni tasodif tufayli yagona o‘tish yo‘lida ham, balkonlarda ham hech kim bo‘lmagan.
Uyda yashaydiganlardan biri binoning o‘zida, shu jumladan, xonadonlarda ham devorlar yorilganini aytdi. Qulashdan bir kun avval xonadonlardagilar g‘ichirlagan tovushni eshitib, bir necha marta qo‘rqqan holda ko‘chaga yugurib chiqqan.
“Fuqarolar turli instansiyalarga murojaat qildi, bir necha oy o‘tdi, biroq muammo hal etilmayapti, — dedi mahalla raisi Erkin Karimov. — Biz bir nechta joylarga murojaat qildik, barcha xatlar turibdi. Ularga javoban boshqa instansiyalarga murojaat qilishimizni yozishadi… Bu yerda yashab bo‘lmay qoldi, hamma joyda, jumladan, podyezdlarda ham yoriqlar bor”.
STV xabariga ko‘ra, shirkat balkonlarni ta’mirlashni boshladi, ammo binoning kapital ta’mirdan chiqarilishi kutilmayapti.
Izoh (0)