Janubiy Koreya elchisi Toshkentdagi Inha universiteti faoliyatiga yuqori baho berdi

Koreya Respublikasining O‘zbekistondagi elchisi Kvon Yon U Toshkentdagi Inha universitetiga tashrif buyurdi. Bu haqda UzDaily xabar bermoqda.

O‘quv yurti rektori Sherzod Shermatov mehmonga universitet haqida, talabalar va o‘qituvchilarga yaratilgan sharoitlar, amalga oshirilayotgan loyiha va tashabbuslar to‘g‘risida ma’lumot berdi.

Kvon Yon U universitet faoliyatiga yuqori baho berdi va mazkur o‘quv yurti haqida ko‘plab ijobiy fikrlar olayotganini bildirdi.

“Toshkentdagi Inha universiteti O‘zbekiston va Janubiy Koreya o‘rtasida ta’lim sohasidagi hamkorlik ramzi hisoblanadi. O‘quv yurtida yuqori standartlarga mos keladigan ta’lim berilmoqda”, —ta’kidladi elchi.

Muzokaralar chog‘ida tomonlar universitet faoliyatini takomillashtirish maqsadida o‘zaro hamkorlikni kengaytirish, shuningdek, o‘quv yurti infrastrukturasini rivojlantirish uchun Janubiy Koreya kompaniyalari moliyaviy va texnik resurslarini jalb etish masalalarini muhokama etdi.