O‘zbekiston IIV tizimida bir qator lavozim o‘zgarishlari amalga oshirildi

O‘zbekiston Respublikasi Ichki ishlar vazirligida bir qator o‘zgarishlar yuz berdi. Bu haqda IIVning “Na postu” nashriga tayanib, “Gazeta.uz” xabar berdi.

Jumladan, polkovnik Saidkarim Nishonboyev mamlakat ichki ishlar vaziri o‘rinbosari etib, Aytbay Temirxanov esa Qoraqalpog‘iston ichki ishlar vaziri etib tayinlandi.

Polkovnik Alisher Ergashev O‘zbekiston IIV Huquqbuzarliklarning oldini olish bosh boshqarmasi boshlig‘i bo‘ldi. IIV Jinoiy qidiruv va terrorizmga qarshi kurash bosh boshqarmasi boshlig‘ining birinchi o‘rinbosari lavozimida polkovnik Nodir Qurbonov faoliyat yuritadi.

Farg‘ona vodiysi ichki ishlar organlarida ham bir qator lavozim o‘zgarishlari qayd etildi. Viloyat IIB Huquqbuzarliklarning oldini olish boshqarmasi boshlig‘i lavozimiga podpolkovnik Farrux O‘sarov, Farg‘ona shahar ichki ishlar boshqarmasiga podpolkovnik Rahmonali Musayev, Qo‘qon IIBga podpolkovnik Azimjon Yuldashev, Quvasoy ichki ishlar bo‘limiga podpolkovnik Qudratjon O‘rinboyev, Uchko‘prik tuman IIBga podpolkovnik Ziyohidin G‘afurov rahbar etib tayinlandi.

Podpolkovnik Otabek Saydahmedov Samarqand viloyat Qo‘shrabot tuman ichki ishlar bo‘limini boshqaradi.