SpaceX kompaniyasi Falcon 9 eltuvchi raketasi parvozlarini eng ertasi bilan joriy yilning noyabrida qayta boshlashni rejalashtirmoqda. Bu haqda kompaniya bosh operatsion direktori Gvin Shotvell ma’lum qildi, deb yozadi Bloomberg.
Uning so‘zlariga ko‘ra, yaqin oylar ichida parvozlar amalga oshirilmaydi. “Biz raketani yana bir marta ko‘zdan kechiramiz, yer ustidagi tizimlarga e’tibor qaratamiz”, — deya aniqlik kiritdi u.
Agentlik ta’kidlashicha, kompaniya vakillari 1-sentabr kuni Kanaveral burnida Falcon 9 portlab ketganidan keyin birinchi marta rasmiy bayonot bermoqda.
SpaceX rahbari Ilon Mask avariya yoqilg‘i quyish vaqtida sodir bo‘lganini ma’lum qildi. Uning so‘zlariga ko‘ra, portlash yuqori pog‘onadagi kislorod bakida yuz bergan. Yong‘in natijasida eltuvchi va uning bosh qismiga o‘rnatilgan foydali yuk tushib qolgan. Raketa orbitaga Isroilning Spacecom kompaniyasi telekommunikatsiya yo‘ldoshini olib chiqishi kerak edi. Qurilmaning narxi 200 million dollarga teng.
Izoh (0)