SpaceX компанияси Falcon 9 элтувчи ракетаси парвозларини энг эртаси билан жорий йилнинг ноябрида қайта бошлашни режалаштирмоқда. Бу ҳақда компания бош операцион директори Гвин Шотвелл маълум қилди, деб ёзади Bloomberg.
Унинг сўзларига кўра, яқин ойлар ичида парвозлар амалга оширилмайди. «Биз ракетани яна бир марта кўздан кечирамиз, ер устидаги тизимларга эътибор қаратамиз», — дея аниқлик киритди у.
Агентлик таъкидлашича, компания вакиллари 1 сентябрь куни Канаверал бурнида Falcon 9 портлаб кетганидан кейин биринчи марта расмий баёнот бермоқда.
SpaceX раҳбари Илон Маск авария ёқилғи қуйиш вақтида содир бўлганини маълум қилди. Унинг сўзларига кўра, портлаш юқори поғонадаги кислород бакида юз берган. Ёнғин натижасида элтувчи ва унинг бош қисмига ўрнатилган фойдали юк тушиб қолган. Ракета орбитага Исроилнинг Spacecom компанияси телекоммуникация йўлдошини олиб чиқиши керак эди. Қурилманинг нархи 200 миллион долларга тенг.
Изоҳ (0)