Vladivostokdagi Shimoliy Koreya bosh konsulligi vakillari Primorye gubernatori o‘rinbosari bilan ishchi uchrashuvi chog‘ida mintaqadagi toshqin oqibatlarini bartaraf etishda yordam taklif etdi. Bu haqda “Kommersant” xabar bermoqda.
“Chindan ham bosh konsul Im Chxon Ir mehnat brigadalarimizni safarbar etishga tayyor ekanligimizni bildirdi. Bu hududlarimiz o‘rtasidagi mustahkam munosabatlardan dalolat beradi. Primorye o‘lkasiga ofat yetkazgan ziyonni bartaraf etishda ko‘mak berish usullarini axtarishda davom etamiz”, — deya ta’kidladi KXDR TIV uchinchi departamenti direktori O Sing Xo.
Rossiyaning Primorye o‘lkasida “Layonrok” to‘foni yopirilganidan so‘ng suv ostida qolgan uylaridan salkam ming kishi evakuatsiya qilindi. Ular 2017-yil 1-sentabri, rasmiylar tiklash ishlarini yakunlagunga qadar vaqtinchalik joylashtirish punktlarida qolishi bildirilmoqda.
Eslatib o‘tamiz, Shimoliy Koreyaning o‘zida “Layonrok” to‘fonidan keyingi toshqinlar oqibatida 133 kishi halok bo‘lgandi.
Izoh (0)