Surxondaryo viloyati bojxona boshqarmasi xodimlari tomonidan tilla va zargarlik buyumlarining bojxona chegaralari orqali noqonuniy tarzda olib o‘tilishiga qarshi chora-tadbirlar davom etmoqda. Bu haqda Davlat bojxona qo‘mitasi axborot xizmati xabar bermoqda.
“Ayritom” chegara-bojxona kompleksida O‘zbekiston hududi orqali xorijga yo‘l olgan Afg‘oniston fuqarosi tomonidan to‘ldirilgan yo‘lovchi bojxona deklaratsiyasidagi ma’lumotlar asosida unga tegishli bagaj va qo‘l yuklari bojxona ko‘rigidan o‘tkazilganda, yuklar orasida deklaratsiyada ko‘rsatilgan miqdordan ortiqcha salkam 4 kilogramm og‘irlikdagi quyma tilla borligi aniqlandi.
Mazkur holat yuzasidan jinoyat ishi qo‘zg‘atilib, Termiz shahar sudining hukmiga binoan aybdorga eng kam oylik ish haqining 300 baravarigacha miqdordagi jarima jazosi tayinlandi.
“Hujjatlarda ko‘rsatilmagan 494,5 million so‘mdan ortiq qiymatdagi salkam 4 kilogramm oltin davlat egaligiga o‘tkazildi”, — deyiladi Davlat bojxona qo‘mitasi axborotida.
Ma’lumot uchun, “Yo‘lovchi bojxona deklaratsiyasini to‘ldirish va rasmiylashtirish tartibi to‘g‘risida”gi yo‘riqnomaga muvofiq, bojxona chegaralarini kesib o‘tish paytida jismoniy shaxslar tomonidan to‘ldiriladigan yo‘lovchi bojxona deklaratsiyasining 5-bandida har qanday ko‘rinishdagi va holatdagi qimmatbaho metallar va qimmatbaho toshlardan yasalgan buyumlarning miqdori aniq ko‘rsatilishi shart.
Izoh (0)