Сурхондарё вилояти божхона бошқармаси ходимлари томонидан тилла ва заргарлик буюмларининг божхона чегаралари орқали ноқонуний тарзда олиб ўтилишига қарши чора-тадбирлар давом этмоқда. Бу ҳақда Давлат божхона қўмитаси ахборот хизмати хабар бермоқда.
«Айритом» чегара-божхона комплексида Ўзбекистон ҳудуди орқали хорижга йўл олган Афғонистон фуқароси томонидан тўлдирилган йўловчи божхона декларациясидаги маълумотлар асосида унга тегишли багаж ва қўл юклари божхона кўригидан ўтказилганда, юклар орасида декларацияда кўрсатилган миқдордан ортиқча салкам 4 килограмм оғирликдаги қуйма тилла борлиги аниқланди.
Мазкур ҳолат юзасидан жиноят иши қўзғатилиб, Термиз шаҳар судининг ҳукмига биноан айбдорга энг кам ойлик иш ҳақининг 300 бараваригача миқдордаги жарима жазоси тайинланди.
«Ҳужжатларда кўрсатилмаган 494,5 миллион сўмдан ортиқ қийматдаги салкам 4 килограмм олтин давлат эгалигига ўтказилди», — дейилади Давлат божхона қўмитаси ахборотида.
Маълумот учун, «Йўловчи божхона декларациясини тўлдириш ва расмийлаштириш тартиби тўғрисида»ги йўриқномага мувофиқ, божхона чегараларини кесиб ўтиш пайтида жисмоний шахслар томонидан тўлдириладиган йўловчи божхона декларациясининг 5-бандида ҳар қандай кўринишдаги ва ҳолатдаги қимматбаҳо металлар ва қимматбаҳо тошлардан ясалган буюмларнинг миқдори аниқ кўрсатилиши шарт.
Изоҳ (0)