Zamonaviy noutbuklar o‘tmishdoshi yaratuvchilaridan biri hisoblanadigan kompyuter texnikasi bo‘yicha mutaxassis Jon Allenbi 75 yoshida San-Fransisko shahridagi uyida vafot etdi. Bu haqda The New York Times manbalariga tayanib, “TASS” xabar bermoqda.
Nashr marhumning o‘g‘li bergan ma’lumotga asoslangan. Allenbi 17-avgust kuni olamdan o‘tgan, uning o‘limi sabablari hozircha aniqlanmadi.
Buyuk Britaniyada tug‘ilgan Jon Allenbi 1980-yillar boshlarida Mauntin-Vyuda (Kaliforniya shtati) Grid Systems kompaniyasiga asos soldi. Konstruktor Uilyam Moggrij bilan birgalikda 1982-yilda bozorga chiqarilgan va Compass deya nom berilgan ilk portativ kompyuterni ishlab chiqqan ixtirochilar guruhini shakllantirdi.
Birinchi leptop sifatida tan olingan va o‘sha vaqt uchun birmuncha qimmat — 8,15 ming dollar turgan Compass qurilmalarining ilk xaridorlari oddiy iste’molchilar emas, AQSh maxsus topshiriq bajaruvchi qo‘shinlari va maxfiy xizmatlari bo‘lgandi.
Izoh (0)