Turkiya harbiy samolyotlari 27-avgust, shanba kuni Suriya hududida chegaradagi Jarablus shahri janubidagi tumanni nazorat qiluvchi o‘z-o‘zini mudofaa qiluvchi kurd xalq otryadlariga tegishli deb taxmin qilinayotgan o‘q-dorilar omborini portlatdi, deya xabar bermoqda “Korrespondent.net” Reutersga tayanib.
Avvalroq kurd bo‘linmalari hujum nishoniga aylanganini ma’lum qilgandi. Turkiyaning bir nechta telekanallari ham o‘q-dorilar omboriga qilingan hujum haqida shunga o‘xshash xabarlarni uzatdi.
24-avgust kuni Turkiya maxsus topshiriqli bo‘linmalari va tanklari AQSh samolyotlari ko‘magida Suriya hududiga kirdi. Harbiylar o‘z harakatlarini strategik muhim shahar Jarablusni IShID jangarilaridan ozod qilish zaruriyati bilan izohladi. Turkiya kuchlari bir sutkadan kamroq vaqt ichida shaharni o‘z nazorati ostiga oldi. Ammo Turkiya hududdagi harbiy salohiyatini kuchaytirishda davom etdi. Ekspertlar fikricha, Turkiya operatsiyasining asosiy maqsadi kurd isyonchilari ko‘tarilishiga yo‘l qo‘ymaslik.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)