Hindiston shimolidagi Jammu va Kashmir shtatining Bandipur shahrida namoyishchilar hamda xavfsizlik kuchlari o‘rtasidagi yangi to‘qnashuvlarda kamida 25 kishi yaralandi. Bu haqda shtat politsiyasi ma’lum qildi, deb xabar beradi “TASS”.
Huquq-tartibot idoralariga ko‘ra, namoyishchilar Bandipurning biryo‘la bir necha tumanlarida politsiya bo‘limlarini toshbo‘ron qilgan. Bunga qarshi javob choralari qo‘llangan.
Kashmir vodiysida ommaviy tartibsizliklar va namoyishlar 8-iyul kuni “Hizb ul-Mujohiddin” ayirmachi guruhi faoli, 22 yoshli Burhon Muzaffar Vani yo‘q qilinganidan so‘ng boshlandi. O‘shandan beri davom etayotgan to‘qnashuvlarda 70 kishi, jumladan, ikki politsiyachi halok bo‘ldi, 6 mingga yaqin kishi yaralandi.
Politsiya va markaziy harbiylashgan kuchlarning 3,5 mingdan ortiq xodimi turli darajada jarohat oldi. 90 ta politsiya bo‘limi, posti va boshqa davlat muassasasi yoqib yuborildi hamda vayron qilindi. 2 mingga yaqin ayirmachi hukumatga qarshi harakatlarda ayblanib qo‘lga olindi.
Izoh (0)