Amerikaning General Motors avtomobil kompaniyasi bir kishining o‘limiga sababchi bo‘lgan yo‘l halokati haqidagi ish bo‘yicha javobgarlikka tortilmaydi. Bunday qarorga 25-avgust, payshanba kuni AQShning Texas shtati Xarris okrugi hakamlar sudi keldi, deb yozadi “TASS”.
Avtogigantga qarshi sud shikoyatini Texas fuqarosi Zakari Stivens bergan. 2011-yilda u o‘zining Saturn Sky avtomobilini boshqarayotib, qarama-qarshi yo‘nalishda kelayotgan avtomobilga urilib ketgan. YTH oqibatida ikkinchi avtomobil haydovchisi voqea joyida halok bo‘ldi, yana bir kishi jarohatlandi. Stivens o‘t oldirish tizimidagi nuqson tufayli tormoz ishlamay qolgani, natijada boshqaruvni yo‘qotganini ta’kidladi.
GM advokatlari esa hodisa Stivensning aybi bilan sodir bo‘lganini, u yomg‘ir tufayli sirpanchiq bo‘lib qolgan yo‘lda tezlikni me’yoridan oshirganini da’vo qildi. Oxir-oqibat, hakamlar himoya tomonining fikriga qo‘shildi va ushbu holatda YTHga nosozlik sabab bo‘lmagan, degan xulosaga keldi.
Izoh (0)