KXDR AQSh va Janubiy Koreyaga preventiv yadro zarbasi berishga tayyorligini e’lon qildi

KXDR qurolli kuchlari AQSh va Janubiy Koreya tomonidan o‘tkazilayotgan Ulchi Freedom Guardian harbiy mashg‘ulotlari tufayli yuqori jangovar shaylikka keltirildi va ushbu mashg‘ulotlar chog‘ida kuzatilishi mumkin bo‘lgan gij-gijlashlarga yadroviy javob berishga tayyor. Bu haqda KXDRning Rossiyadagi elchisi Kim Xyon Chjun “Interfaks”ga bergan intervyusida ma’lum qildi.

“Harbiy mashg‘ulotlar boshlangani tufayli, Koreya xalq armiyasi bosh shtabi va KXDR tashqi ishlar vazirligi o‘z bayonotlarini berdi. Xususan, Koreya xalq armiyasi birinchi eshelon qo‘shilmalari doimiy jangovar shaylik holatida turadi”, — dedi u.

“Agar bizning suverenitetimiz amal qiladigan muqaddas hudud, hududiy suvlar va havo hududiga nisbatan birorta tajovuz belgisi kuzatilsa, biz shafqatsiz preventiv yadro zarbasi bilan gij-gijlash o‘choqlarini kultepaga aylantiramiz”, — deya ta’kidladi Kim Xyon Chjun.

Amerika—Janubiy Koreya harbiy mashqlari  22-avgustdan sentabr boshigacha o‘tkaziladi. Shimoliy Koreya muassasasi bayonotida aytilishicha, ushbu mashg‘ulotlar maqsadi — KXDRga kutilmagan zarba berish va uning hududini egallab olish.