Asosan fransiyalik sayohatchilardan tashkil topgan “Parij — Pekin — Istanbul” avtouylar karvoni Toshkent shahriga yetib keldi. Bu haqda o‘zbekistonlik avtohavaskorlarning Facebook’dagi sahifalarida xabarlar qoldirilgan.
Xususan, fotoxabarlarning birida Toshkentning Labzak dahasida qator bo‘lib to‘xtab turgan kemperlar jamlanmasini ko‘rish mumkin.
Foydalanuvchilarning yozishicha, mazkur karvon uch kun avval Qirg‘izistondan Andijon viloyati hududiga kirgan edi.
20-avgust kuni esa “Voditeli Tashkenta” guruhida Farg‘ona viloyati bo‘ylab harakatlanayotgan avtouylardan birining surati e’lon qilingan edi.
Karvonning rasmiy saytida yozilishicha, sayohatchilar 2016-yilning 7-iyun kuni Parijdan yo‘lga chiqqan bo‘lib, hozirga qadar Polsha, Chexiya, Belarus, Rossiya, Mo‘g‘uliston, Xitoy va Qirg‘iziston hududini kesib o‘tgan.
Sayohatchilar O‘zbekistonda, Farg‘ona vodiysi shaharlari va Toshkentdan tashqari, Samarqand va Nukusda ham bo‘lib, so‘ng Qozog‘iston, Rossiyaning janubiy hududlari va Gruziya orqali Turkiyaga kiradi.
Reja bo‘yicha, avtouylar karvoni 2016-yilning 15-sentabr kuni Turkiyaning Istanbul shahriga yetib borishi kerak.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)