Асосан франциялик саёҳатчилардан ташкил топган «Париж — Пекин — Истанбул» автоуйлар карвони Тошкент шаҳрига етиб келди. Бу ҳақда ўзбекистонлик автоҳаваскорларнинг Facebook’даги саҳифаларида хабарлар қолдирилган.
Хусусан, фотохабарларнинг бирида Тошкентнинг Лабзак даҳасида қатор бўлиб тўхтаб турган кемперлар жамланмасини кўриш мумкин.
Фойдаланувчиларнинг ёзишича, мазкур карвон уч кун аввал Қирғизистондан Андижон вилояти ҳудудига кирган эди.
20 август куни эса «Водители Ташкента» гуруҳида Фарғона вилояти бўйлаб ҳаракатланаётган автоуйлардан бирининг сурати эълон қилинган эди.
Карвоннинг расмий сайтида ёзилишича, саёҳатчилар 2016 йилнинг 7 июнь куни Париждан йўлга чиққан бўлиб, ҳозирга қадар Польша, Чехия, Беларусь, Россия, Мўғулистон, Хитой ва Қирғизистон ҳудудини кесиб ўтган.
Саёҳатчилар Ўзбекистонда, Фарғона водийси шаҳарлари ва Тошкентдан ташқари, Самарқанд ва Нукусда ҳам бўлиб, сўнг Қозоғистон, Россиянинг жанубий ҳудудлари ва Грузия орқали Туркияга киради.
Режа бўйича, автоуйлар карвони 2016 йилнинг 15 сентябрь куни Туркиянинг Истанбул шаҳрига етиб бориши керак.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)