BMT 18-avgust, payshanba kuni 2010-yili Gaitida vabo epidemiyasi yuzaga kelishiga aloqadorligini tan oldi. Xalqaro tashkilot rasmiy vakilining o‘rinbosari Farxan Xaqning bildirishicha, BMT rahbariyati odamlar chekayotgan aziyatni yengillatish uchun “ko‘proq ishlarni amalga oshirishi lozimligi” to‘g‘risidagi xulosaga keldi. Bu haqda “TASS” xabar bermoqda.
2010-yil oktabridan beri Gaitida vabodan 9 mingga yaqin kishi o‘ldi, kasallanganlar soni esa 700 ming kishidan oshdi. Mahalliy aholi va epidemiologlar fikriga ko‘ra, kasallik tarqalishiga BMTning nepallik tinchlikparvar kuchlari lageridan Artibonit daryosiga oqava suvlar tashlanishi sabab bo‘lgan. Nepalliklar mamlakatga 220 mingdan ortiq kishini hayotdan olib ketgan vayronkor zilziladan so‘ng yuborilgandi.
BMT Gaitiga vaboga qarshi kurashda yordam berib kelayotgan bo‘lsa-da, shu paytgacha uning vakillari infeksiya o‘chog‘ini aniq belgilash mumkin emasligini ro‘kach qilib, epidemiya tarqalishidagi javobgarlikni zimmasiga olishdan bosh tortib kelayotgandi.
Izoh (0)