19-avgust, juma kungi savdolarda pastlashdan boshlangan neft narxi keyinchalik ko‘tarilishni boshladi va haftani oxirgi besh oy mobaynidagi rekord ko‘rsatkich bilan yakunlashi kutilmoqda. Bu haqda “Interfaks” xabar bermoqda.
Xomashyo zaxiralari kamayishi, shuningdek, ishlab chiqaruvchi mamlakatlarning qazib olishni cheklashga qaratilgan ehtimoliy hamkorlikdagi harakatlari haqidagi xabarlar tufayli neft oy boshidagi ko‘rsatkichlarga nisbatan 20 foizdan oshiqroqqa qimmatladi. Londonning ICE Futures birjasida oktabrda yetkazib beriladigan Brent turidagi neftning bir barreli 50,88 dollarni tashkil etdi. Nyu-Yorkning NYMEX tovar birjasida sentabrda yetkaziladigan WTI turidagi neftning bir barreli 48,36 dollardan iborat bo‘ldi.
OPEK a’zolari bo‘lgan davlatlarning uchrashuvi sentabr oxirida bo‘lib o‘tishi rejalashtirilgan. Unda qator mamlakatlar qazib olishni cheklash bo‘yicha muzokaralar tiklanishiga qiziqish bildirgan.
Izoh (0)