БМТ 18 август, пайшанба куни 2010 йили Гаитида вабо эпидемияси юзага келишига алоқадорлигини тан олди. Халқаро ташкилот расмий вакилининг ўринбосари Фархан Хақнинг билдиришича, БМТ раҳбарияти одамлар чекаётган азиятни енгиллатиш учун «кўпроқ ишларни амалга ошириши лозимлиги» тўғрисидаги хулосага келди. Бу ҳақда «ТАСС» хабар бермоқда.
2010 йил октябридан бери Гаитида вабодан 9 мингга яқин киши ўлди, касалланганлар сони эса 700 минг кишидан ошди. Маҳаллий аҳоли ва эпидемиологлар фикрига кўра, касаллик тарқалишига БМТнинг непаллик тинчликпарвар кучлари лагеридан Артибонит дарёсига оқава сувлар ташланиши сабаб бўлган. Непалликлар мамлакатга 220 мингдан ортиқ кишини ҳаётдан олиб кетган вайронкор зилзиладан сўнг юборилганди.
БМТ Гаитига вабога қарши курашда ёрдам бериб келаётган бўлса-да, шу пайтгача унинг вакиллари инфекция ўчоғини аниқ белгилаш мумкин эмаслигини рўкач қилиб, эпидемия тарқалишидаги жавобгарликни зиммасига олишдан бош тортиб келаётганди.
Изоҳ (0)