Rossiyaning Sharqiy harbiy okrug raketa bo‘linmalari harbiy xizmatchilari “Iskandar-M” ballistik raketasining o‘quv-jangovar uchirilishini amalga oshirdi. Bu haqda okrug vakili polkovnik Aleksandr Gordeyev ma’lum qildi, deya xabar beradi “Interfaks”.
“Uchirish Yahudiy avtonom viloyatidagi o‘quv-mashg‘ulot majmuidan bajarildi. Raketa Amur viloyatida joylashgan poligonlardan biridagi nishonga muvaffaqiyatli borib tegdi, parvoz masofasi 300 kilometrni tashkil etdi”, — deya aniqlik kiritdi Gordeyev.
Okrug vakiliga ko‘ra, raketaning mo‘ljalga aniq yetib borishi natijasida harbiy infrastrukturaning bir necha obyektlari, jumladan, ramziy raqib qo‘mondonlik punkti yo‘q qilindi. Bu esa Amur viloyatidagi poligonda bo‘lib o‘tayotgan ikki tomonlama qo‘mondonlik-shtab mashqlari davomida motoo‘qchi qismlarga hujumga o‘tish imkonini berdi.
Izoh (0)