Rossiya paralimpiya qo‘mitasi CAS’ga topshirish uchun Xalqaro paralimpiya qo‘mitasi bilan arbitraj kelishuvini muvofiqlashtirmoqda

Rossiya paralimpiya qo‘mitasi Sport arbitraj sudi (CAS)ga da’vo arizasi berish uchun Xalqaro paralimpiya qo‘mitasi bilan arbitraj kelishuvini muvofiqlashtirmoqda, deb yozadi “TASS” Rossiya paralimpiya qo‘mitasi matbuot kotibiga tayanib.

7-avgust kuni Xalqaro paralimpiya qo‘mitasi Rossiya paralimpiya qo‘mitasini chetlashtirib, rossiyalik sportchilarning Rio-de-Janeyrodagi Paralimpiya o‘yinlaridagi ishtirokiga yo‘l qo‘ymaslik haqida qaror qabul qilgan edi.

Nashr eslatishicha, Rossiya sport vaziri Vitaliy Mutko Rossiya paralimpiya qo‘mitasi Rossiya olimpiya qo‘mitasi izidan borishi kerakligini aytgandi. Gap shundaki Rossiya olimpiya qo‘mitasi Yengil atletika federatsiyalari xalqaro assotsiatsiyasi bilan arbitraj bitimini imzolagan, bu CAS’ga ishni ikki hafta ichida ko‘rib chiqish imkonini bergan edi. Ushbu bitimni CAS’ga taqdim etishdan maqsad sudning bahsni tezkor tartibda ko‘rib chiqishini ta’minlashdan iboratdir.

Avvalroq Xalqaro paralimpiya qo‘mitasi (XPQ)ning prezidenti Filipp Kreyven Rossiya paralimpiya qo‘mitasi XPQ a’zoligidan mahrum bo‘lgani, shu tufayli, rossiyalik paralimpiyachilar Rio-de-Janeyrodagi Paralimpiada o‘yinlarida qatnasha olmasligini ma’lum qilgan edi. Mutko esa Xalqaro paralimpiya qo‘mitasining rossiyaliklarni Rio-de-Janeyrodagi O‘yinlardan chetlatish qarorini qoralab, uni sog‘lom fikr yuritmaslikda ayblagandi.