AQShning Business Insider nashri o‘zbekistonlik sportchi Oksana Chusovitina haqida maqola chop etdi.
“Olimpiada o‘yinlari doim g‘aroyib voqealarga boy bo‘lib kelgan, ammo bu ro‘yxatning eng tepasida gimnastikachi Oksana Chusovitinaning tarixi tursa, ajab emas”, — deb boshlanadi maqola.
“Chusovitina o‘zbekistonlik 41 yoshli (41!) ona bo‘lib, Olimpiada o‘yinlarida yettinchi marta qatnashmoqda. Shuning o‘ziyoq rekord bo‘lib qolmasdan, u shug‘ullanadigan sport turini hisobga olganda, hayratlanarli hamdir”, — deya qayd etiladi maqolada.
Ta’kidlanishicha, Chusovitinaning raqiblaridan ko‘pchiligining yoshi uning yoshining yarmiga teng yoki undan ham kichik. AQSh ayol gimnastikachilari termasining a’zosi Lori Ernandez esa, qayd etilishicha, Chusovitinaning 16 yoshli o‘g‘lidan yetti oylikka kattaroq, xolos.
“Katta savol shundaki, hozirda Chusovitina birinchi Olimpiada medalini qo‘lga kiritganidan keyin (1992-yil) tug‘ilgan sportchilar faoliyat yuritayotgan sport turi bo‘yicha yuqori darajada musobaqalashishda davom etish uchun u o‘zini qanday tayyorlaydi?” — deyiladi maqolada.
Bunga javob sifatida sportchining ESPNW nashriga bergan intervyusidan parcha keltiriladi:
“Men ruhiy mashqlarni ko‘p bajaraman. Tanam yillar davomida mushaklar xotirasini ishlab chiqqan. Men odatda sport zalida 2—2,5 soat mashq qilaman… so‘ng ma’lum bir mashq aynan qay tarzda bajarilishini tasavvur qilaman. Buni men kallamda bajaraman, sport zaliga borgach esa, nonushtadan keyingi yoki shunchaki sayr vaqtidagi ruhiy tayyorgarlik sport zaliga ko‘chadi. Agar sakramoqchi bo‘lsam, men gavdam aynan nima qilishi kerakligini bilaman”.
“Umuman olganda, Chusovitina gimnastika bilan shunchalik uzoq vaqtdan buyon shug‘ullanayotgani tufayli, sport zaliga borib, to‘xtovsiz mashq qilishga ehtiyoji yo‘q. Muvaffaqiyatga erishish uchun bajarishi kerak bo‘lgan yagona narsa — bu haqda o‘ylash, xolos”, — deya xulosa qildi Business Insider.
“22 yoshli Eli Reizmen o‘z jamoadoshlari tomonidan ‘Eli buvi’ deb ataladigan sport turi uchun yomon natija emas”, — deya maqolaga yakun yasaldi.
Izoh (0)