Россия паралимпия қўмитаси CAS’га топшириш учун Халқаро паралимпия қўмитаси билан арбитраж келишувини мувофиқлаштирмоқда

Россия паралимпия қўмитаси Спорт арбитраж суди (CAS)га даъво аризаси бериш учун Халқаро паралимпия қўмитаси билан арбитраж келишувини мувофиқлаштирмоқда, деб ёзади «ТАСС» Россия паралимпия қўмитаси матбуот котибига таяниб.

7 август куни Халқаро паралимпия қўмитаси Россия паралимпия қўмитасини четлаштириб, россиялик спортчиларнинг Рио-де-Жанейродаги Паралимпия ўйинларидаги иштирокига йўл қўймаслик ҳақида қарор қабул қилган эди.

Нашр эслатишича, Россия спорт вазири Виталий Мутко Россия паралимпия қўмитаси Россия олимпия қўмитаси изидан бориши кераклигини айтганди. Гап шундаки Россия олимпия қўмитаси Енгил атлетика федерациялари халқаро ассоциацияси билан арбитраж битимини имзолаган, бу CAS’га ишни икки ҳафта ичида кўриб чиқиш имконини берган эди. Ушбу битимни CAS’га тақдим этишдан мақсад суднинг баҳсни тезкор тартибда кўриб чиқишини таъминлашдан иборатдир.

Аввалроқ Халқаро паралимпия қўмитаси (ХПҚ)нинг президенти Филипп Крейвен Россия паралимпия қўмитаси ХПҚ аъзолигидан маҳрум бўлгани, шу туфайли, россиялик паралимпиячилар Рио-де-Жанейродаги Паралимпиада ўйинларида қатнаша олмаслигини маълум қилган эди. Мутко эса Халқаро паралимпия қўмитасининг россияликларни Рио-де-Жанейродаги Ўйинлардан четлатиш қарорини қоралаб, уни соғлом фикр юритмасликда айблаганди.