FIFA WADA’ning hisobotida qayd etilgan 11 rossiyalik futbolchiga nisbatan tergov ishi boshlagani haqida ma’lum qildi

Xalqaro futbol federatsiyalari uyushmasi (FIFA) Butunjahon antidoping agentligi (WADA)ning Richard Maklaren boshchiligidagi mustaqil komissiyasi hisobotida nomi keltirilgan 11 nafar rossiyalik futbolchiga nisbatan tergov ishi boshlagani haqida ma’lum qildi, deb xabar bermoqda “TASS”.

Komissiyaning qayd etishicha, WADA tomonidan FIFAga ijobiy doping namunalari yashirilgan 11 nafar rossiyalik futbolchining ma’lumotlari taqdim etilgan. “FIFA Maklaren va WADA bilan hamkorlikda 11 rossiyalik futbolchiga nisbatan tergov ishini boshladi va bu masala yuzasidan Rossiya futbol ittifoqi bilan bog‘landi”, – deyiladi FIFA matbuot xizmatining xabarida.

Rossiya futbol ittifoqi FIFAdan WADA’ning hisobotida nomi keltirilgan 11 futbolchining doping namunalarini taqdim qilish yuzasidan so‘rovini qabul qilganini tasdiqladi.

“Biz ushbu masala yuzasidan barcha tegishli tashkilotlar bilan ishlaymiz va FIFAga har tomonlama yordam beramiz”, – deyiladi Rossiya futbol ittifoqi matbuot xizmatining xabarida.

• WADA mustaqil komissiyasi Rossiya sport vazirligini doping qo‘llanilishini bevosita nazorat qilishda aybladi