ФИФА WADA’нинг ҳисоботида қайд этилган 11 россиялик футболчига нисбатан тергов иши бошлагани ҳақида маълум қилди

Халқаро футбол федерациялари уюшмаси (ФИФА) Бутунжаҳон антидопинг агентлиги (WADA)нинг Ричард Макларен бошчилигидаги мустақил комиссияси ҳисоботида номи келтирилган 11 нафар россиялик футболчига нисбатан тергов иши бошлагани ҳақида маълум қилди, деб хабар бермоқда «ТАСС».

Комиссиянинг қайд этишича, WADA томонидан ФИФАга ижобий допинг намуналари яширилган 11 нафар россиялик футболчининг маълумотлари тақдим этилган. «ФИФА Макларен ва WADA билан ҳамкорликда 11 россиялик футболчига нисбатан тергов ишини бошлади ва бу масала юзасидан Россия футбол иттифоқи билан боғланди», – дейилади ФИФА матбуот хизматининг хабарида.

Россия футбол иттифоқи ФИФАдан WADA’нинг ҳисоботида номи келтирилган 11 футболчининг допинг намуналарини тақдим қилиш юзасидан сўровини қабул қилганини тасдиқлади.

«Биз ушбу масала юзасидан барча тегишли ташкилотлар билан ишлаймиз ва ФИФАга ҳар томонлама ёрдам берамиз», – дейилади Россия футбол иттифоқи матбуот хизматининг хабарида.

• WADA мустақил комиссияси Россия спорт вазирлигини допинг қўлланилишини бевосита назорат қилишда айблади