Uorren Baffet 8-noyabrda saylovchilarni ovoz berish uchun shaxsan o‘zi eltib qo‘yishni va’da qildi

AQSh va dunyoning eng badavlat kishilaridan biri Uorren Baffet 8-noyabrda bo‘lib o‘tadigan prezidentlik saylovlarida ishtirok etishi uchun bunga ehtiyoji bor amerikaliklarni shaxsan o‘zi saylov uchastkalariga olib borishga va’da berdi. Bu haqda milliarder ona shahri Omaxadagi (Nebraska shtati) saylovoldi mitingida Hillari Klinton bilan birga chiqishi chog‘ida ma’lum qildi, deya xabar beradi “TASS”.

Baffet internetda nomi “Saylovlarga olib boramiz” deya tarjima qilinadigan maxsus sayt yaratilganini e’lon qildi. Saylovchilarga shunday xizmat nafaqat ovoz berish, balki ro‘yxatdan o‘tish chog‘ida ham ko‘rsatiladi. Shuningdek, u 8-noyabr kuni shaxsan kamida 10 kishini saylov uchastkalariga eltib qo‘yishni va’da qildi.

Qolaversa, Baffet saylov kuniga 32 o‘rinli sayohat avtobusini to‘liq band etib qo‘ygani va unda “saylovchilar bilan uchastkalarga borish, selfiga tushish, umuman, Klintonga ko‘mak uchun zarur nimaiki bo‘lsa, amalga oshirishi”ni ta’kidlab o‘tdi.