Janubiy Koreyaning yirik banklari foydalanuvchilarni ko‘z to‘rpardasi orqali shaxsini aniqlash tizimini joriy etmoqda

Janubiy Koreyaning ikki yirik banki — KEB Hana Bank va Woori Bank mobil banking foydalanuvchilarini ko‘z to‘rpardasi orqali shaxsini aniqlash tizimini joriy etmoqda. Bu haqda moliyaviy muassasalarning matbuot xizmatlari ma’lum qildi, deya xabar beradi “TASS”.

“Shaxsni aniqlash tizimi shu oy davomida, mamlakatda Samsung kompaniyasining ko‘z to‘rpardasi skaneri bilan jihozlangan Galaxy Note 7 telefoni sotuvi boshlangandan so‘ng ishlay boshlaydi. Ko‘z to‘rpardasini aniqlash texnologiyasi ilg‘or va murakkab bo‘lib, bu uni buzishga bo‘lgan urinishlarni deyarli chippakka chiqaradi. Yangi tizimning ishga tushirilishi foydalanuvchilar xavfsizligi darajasini sezilarli darajada oshirib, tarmoqda faoliyat olib boradigan firibgarlardan himoya etishi kutilmoqda”, — deyiladi press-relizda. 

Mamlakatdagi uchinchi yirik bank bo‘lmish Shinhan Bank ham shunday tizim ishga tushirilishi ehtimolini ko‘rib chiqmoqda. Galaxy Note 7 smartfoni taqdimoti 2-avgust kuni AQShda bo‘lib o‘tdi. Uning Janubiy Koreyadagi sotuvi shu oy o‘rtalaridan boshlanadi.