Amerikaning Facebook kompaniyasi AQShda soliq to‘lamaslik uchun o‘z aktivlari narxini pasaytirib ko‘rsatgani tufayli, 3 milliarddan 5 milliard dollargacha jarimaga tortilishi mumkin, deya xabar bermoqda “TASS” CNN telekompaniyasiga tayanib.
CNN Facebook 28-iyul kuni AQShning Qimmatli qog‘ozlar va birjalar bo‘yicha komissiyasiga ko‘rib chiqish uchun yuborgan hujjatlarga asoslandi.
Materiallarga ko‘ra, kompaniya aybdor deb topilgan taqdirda, jarima uning moliyaviy holatiga “salbiy ta’sir o‘tkazishi”ni tan oldi. “Biz Ichki daromadlar xizmati (AQSh soliq xizmati) pozitsiyasiga qarshimiz va uning bildirishnomasidan norozi bo‘lib, AQSh Soliq sudiga shikoyat arizasi beramiz”, — deya iqtibos keltirdi CNN hujjatlardan.
Avvalroq AQSh Adliya vazirligi Facebook’dan mazkur kompaniyaning mamlakatda soliq to‘lashdan bo‘yin tovlashi yuzasidan olib borilayotgan tekshiruv o‘tkazayotgan Ichki daromadlar xizmati bilan hamkorlik qilishini talab etgan edi. AQSh Ichki daromadlar xizmati (IDX) Ernst & Young auditorlik kompaniyasini soliq to‘lashdan qochish ishida sheriklikda aybladi. Kompaniya Facebook aktivlarini baholash uchun vakolatli bo‘lgan va ularning qiymatini “milliardlab dollar”ga pasaytirgan. IDX o‘zining gumonlarini tasdiqlash yoki rad etish uchun Facebook’dan moliyaviy hujjatlarni olishga bir necha bor urindi. Xizmat vakili Nina Vu Stounning bildirishicha, iyun oyining o‘zida oltita shunday so‘rov jo‘natilgan, biroq Mark Sukerberg yetakchiligidagi kompaniya ularga bo‘ysunmagan. Shundan so‘ng mazkur ishga AQSh Adliya vazirligi aralashdi.
Izoh (0)