Janubiy Koreya tashqi ishlar vaziri: Seul THAAD raketaga qarshi tizimini joylashtirish haqida to‘g‘ri qaror qabul qildi

3-avgust kuni KXDR tomonidan yana bir ballistik raketa uchirilishi Janubiy Koreyaga Amerikaning THAAD raketaga qarshi mudofaa majmuasini joylashtirish haqidagi qaror to‘g‘ri bo‘lganidan darak beradi. Bu haqda Koreya Respublikasi tashqi ishlar vaziri Yun Byon Se Seulda jurnalistlarga ma’lum qildi, deb yozadi “TASS”.

“Bugungi raketa parvozi — Shimoliy Koreyaning raketa xavfi moddiy tus olayotganini yaqqol namoyon qiladi, — deya ta’kidladi tashqi ishlar vaziri. — Bu aynan THAAD’ni Janubiy Koreyaga joylashtirish zaruratidan darak beruvchi vaziyatdir”.

Raketa uchirilishining ehtimoliy sabablari haqida gapirar ekan, Yun Byon Se ular “butunlay xilma-xil” bo‘lishi mumkinligini qayd etdi va shu tariqa Pxenyan avgust o‘rtalarida bo‘lib o‘tadigan AQSh va Janubiy Koreyaning keng ko‘lamli harbiy manyovrlari yuzasidan o‘z noroziligini bildirayotganini taxmin qildi.

Koreya Respublikasi shtab boshliqlari qo‘mitasi KXDR 3-avgust kuni mahalliy vaqt bilan 07:50 (Toshkent vaqti bilan 03:50)da Yapon dengiziga qarata ballistik raketa uchirganini ma’lum qilgan edi.