Rossiya AQShni o‘nlab suriyalik fuqarolar o‘limida aybladi

Suriyada so‘nggi haftalar ichida AQSh rahbarligidagi IShIDga qarshi kurash koalitsiyasi aviazarbalari natijasida o‘nlab tinch aholi vakillari, jumladan, ayollar va bolalar halok bo‘ldi, deb yozadi “Gazeta.ru” Rossiyaning BMTdagi doimiy vakili o‘rinbosari Yevgeniy Zagaynovga tayanib.

“Yaqin Sharq va Shimoliy Afrikaning qator mamlakatlarida vaziyat tashvishli bo‘lib qolmoqda. So‘nggi kunlar va haftalarning o‘zidayoq Suriyada AQSh boshchiligidagi koalitsiya aviazarbalari natijasida o‘nlab fuqarolar, jumladan, ayollar va bolalar halok bo‘ldi”, — dedi Zagaynov BMT Xavfsizlik Kengashi majlisidagi nutqida.

Doimiy vakil o‘rinbosari, shuningdek, maktablar, kasalxonalar va fuqarolik infratuzilmasining boshqa obyektlari vayron bo‘lgani, shuningdek, dunyoning turli mintaqalaridagi qurolli nizolar bolalar uchun keltirib chiqaradigan oqibatlarni ta’kidlab o‘tdi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.