Жанубий Корея ташқи ишлар вазири: Сеул THAAD ракетага қарши тизимини жойлаштириш ҳақида тўғри қарор қабул қилди

3 август куни КХДР томонидан яна бир баллистик ракета учирилиши Жанубий Кореяга Американинг THAAD ракетага қарши мудофаа мажмуасини жойлаштириш ҳақидаги қарор тўғри бўлганидан дарак беради. Бу ҳақда Корея Республикаси ташқи ишлар вазири Юн Бён Се Сеулда журналистларга маълум қилди, деб ёзади «ТАСС».

«Бугунги ракета парвози — Шимолий Кореянинг ракета хавфи моддий тус олаётганини яққол намоён қилади, — дея таъкидлади ташқи ишлар вазири. — Бу айнан THAAD’ни Жанубий Кореяга жойлаштириш заруратидан дарак берувчи вазиятдир».

Ракета учирилишининг эҳтимолий сабаблари ҳақида гапирар экан, Юн Бён Се улар «бутунлай хилма-хил» бўлиши мумкинлигини қайд этди ва шу тариқа Пхеньян август ўрталарида бўлиб ўтадиган АҚШ ва Жанубий Кореянинг кенг кўламли ҳарбий манёврлари юзасидан ўз норозилигини билдираётганини тахмин қилди.

Корея Республикаси штаб бошлиқлари қўмитаси КХДР 3 август куни маҳаллий вақт билан 07:50 (Тошкент вақти билан 03:50)да Япон денгизига қарата баллистик ракета учирганини маълум қилган эди.