Amerika xedj-fondlari AQShdagi joriy saylovoldi kampaniyasini ancha faolroq tarzda moliyalashtirmoqda, deb yozadi “TASS”.
Demokratik partiyadan AQSh prezidentligiga nomzod Hillari Klintonni qo‘llab-quvvatlovchi tashkilotlarga ular ko‘ngilli ravishda 48,5 million dollar xayriya qildi. Davlat rahbari lavozimiga Respublikachilar partiyasidan nomzod Donald Tramp tarafdorlari hissasiga bor-yo‘g‘i 19 ming dollar to‘g‘ri keldi.
“Mas’uliyatli siyosat markazi” nohukumat tashkiloti ma’lumotlariga ko‘ra, xedj-fondlar bu yil respublikachilarga 65,8 million dollar xayriya qilgan. Uning katta qismi respublikachilar o‘rtasidagi poyganing saralash bosqichida Trampning raqobatchilariga tegdi.
Umuman, xedj-fondlar bu yil saylov maqsadlari uchun ikkala partiyaga 122,7 million dollar mablag‘ni beminnat ko‘chirib berdi. Bu 2012-yilgi saylovoldi kampaniyasi paytidagidan ikki barobar ko‘p demakdir. Xayriya mablag‘lari, asosan, prezident lavozimiga muayyan da’vogarlarga emas, ularni qo‘llab-quvvatlayotgan tashkilotlarga yo‘naltiriladi. Bu borada ko‘rsatkich to‘rt yil avvalgi 33,5 million dollardan hozirgi 103,1 million dollargacha o‘sdi.
Izoh (0)