Bugungi kunda ko‘plab ota-onalar farzandlarini doimiy ravishda turli mashg‘ulotlar, o‘yinlar va multfilmlar bilan band qilishga intiladi. Ammo psixologlar ta’kidlashicha, bola uchun ba’zan hech narsa qilmasdan, oddiygina zerikib o‘tirish ham foydali. Bu uning tasavvuri, ijodkorligi va mustaqil fikrlash qobiliyatini rivojlantiradi.
Rossiyalik psixolog Galina Gubanova buni shunday izohlaydi:
“Zamonaviy oilalarda ota-onalar bolalarni juda erkalatishadi, natijada ular hech qachon zerikmaydi va o‘z tasavvurini ishga solishga majbur bo‘lmaydi. Aslida esa bu kelajakdagi, jumladan, intellektual rivojlanishdagi juda muhim jarayon hisoblanadi”.
Zerikishning foydasi
Tadqiqotlar shuni ko‘rsatadiki, ortiqcha tashqi stimullar — rang-barang o‘yinchoqlar, ko‘plab to‘garaklar va multfilmlar bolaning diqqatini chalg‘itadi. U ko‘p narsani bilishi mumkin, ammo qaror qabul qilishda qiynaladi, boshlagan ishini oxiriga yetkaza olmaydi.
Britaniyalik psixolog Syuzen Makdonaldning fikricha, zerikish bolaning miyasi uchun bo‘sh sahifa vazifasini bajaradi va bola aynan shu sahifani o‘zi xohlagancha to‘ldiradi. Bu jarayonda bola muammolarni mustaqil hal qilish, ijodiy fikrlash va o‘zini o‘zi rag‘batlantirish ko‘nikmalarini rivojlantiradi.
Ota-onalarga amaliy tavsiyalar
Ekran vaqtini cheklang. Smartfon va televizorni ortiqcha ishlatish bolani tayyor kontentga o‘rganib qolishiga olib keladi;
Oddiy o‘yinchoqlar bering. Karton quti, kublar, qog‘oz va ruchka kabi vositalar tasavvurni kuchaytiradi;
Mustaqil o‘ynash uchun sharoit yarating. Har daqiqa bola bilan shug‘ullanish shart emas — unga o‘zi topgan o‘yinlarni o‘ynashga imkon bering;
Ochiq havoda vaqt o‘tkazing. Tabiat qo‘ynida bolalar mustaqil ravishda yangi qiziqishlar va o‘yin qoidalarini yarata oladi.
Izoh (0)