Yevroittifoq kelasi yildan asta-sekinlik bilan Rossiyaga qarshi iqtisodiy sanksiyalarni bekor qilishni boshlaydi. Bu haqda Reuters’ga ikki nafar yevropalik diplomat ma’lum qildi, deb yozadi “RBK”.
“Ehtimol, sanksiyalarning barchasi biryo‘la bekor qilinmasligi mumkin, ammo ularni kelasi yili bitta sektordan olib tashlashga qaror qilinishi mumkin”, — dedi agentlik suhbatdoshlari.
Diplomatlar so‘zlariga ko‘ra, Yevroittifoq sanksiyalar masalasida yakdil emas, chunki Rossiya kontrsanksiyalaridan eng ko‘p azob chekkan mamlakatlar rahbariyati o‘z fermerlari va kompaniyalari tomonidan katta bosim ostida qoldi.
Agentlik suhbatdoshlari, shuningdek, manfaatli oldi-sotdilarni va’da qilib, mahsulotlar importiga qo‘yilgan taqiq tufayli qo‘ldan chiqarilgan foyda haqida eslatayotgan Rossiyaning xatti-harakatlariga e’tibor qaratdi.
Reuters eslatishicha, Germaniyada tashqi ishlar vaziri Frank-Valter Shtaynmayyer sanksiyalar bosqichma-bosqich bekor qilinishini yoqlab chiqmoqda, bu esa kansler Angela Merkelning pozitsiyasiga zid kelmoqda. Diplomatlar ta’kidlashicha, nemis biznesi tomonidan unga o‘tkazilayotgan bosim o‘sib boradi.
Izoh (0)