Alexandro Garnacho “Manchester Yunayted” rahbariyatiga shart qo‘ydi

“Manchester Yunayted” futbolchisi, 21 yoshli argentinalik vinger Alexandro Garnacho klub rahbariyatidan “Chelsi”ning taklifini qabul qilishni talab qilmoqda. Bu haqda insayder Fabrisio Romano xabar bermoqda.

Unga ko‘ra, Garnacho “qizil iblislar” rahbariyatiga shart qo‘yib, agar uni “Chelsi”ga transfer qilishni istamasa, 6–12 oy davomida zaxirada o‘tirishga tayyor ekanini bildirgan. Avvalroq “Manchester Yunayted” futbolchi uchun 70 million funt sterling talab qilayotgani haqida xabarlar tarqalgandi. Endi esa klub ushbu narxni pasaytirgan va hozirda Garnachoni 50 million funt evaziga sotib yuborishga tayyor.

Oldinroq “Chelsi” “Manchester Yunayted”ga argentinalik yarim himoyachini o‘z futbolchilaridan biri bilan almashtirishni taklif qilgani xabar qilingandi. Biroq “Manchester Yunayted” bu taklifga rad javobini bergan va futbolchini faqat naqd pulga sotmoqchi ekanligini bildirgan.

• Alexandro Garnacho o‘tgan mavsum barcha turnirlar doirasidagi 58 o‘yinda maydonga tushib, o‘z hisobiga 11 ta gol va 10 ta golli uzatma yozdirib qo‘ygan.
• Uning “Manchester Yunayted” bilan shartnomasi 2028-yil yozigacha amal qiladi.
• Transfermarkt portali futbolchining qiymatini 45 million yevroga baholagan.